من نحن

من أيام الثانوية، وأنا عندي شغف كبير بالعبايات الواسعة، خصوصًا الملاحف المميزة والموديلات اللي ليها طابع خاص. حتى في أهم المناسبات، ماكنتش بدور على فساتين، بالعكس… كنت بدور على عباية مختلفة، شيك ومميزة، تعبر عن شخصيتي.

لكن للأسف، المشوار ماكنش سهل! ساعات كنت بدور كتير عشان ألاقي حاجة تعجبني، وأوقات اضطر للتفصيل، والنتيجة للأسف ماكانتوش بتبقى زي ما أتمنى. ساعات كنت بجيب أحلى اللي موجود وخلاص، حتى ما لقيت بنت موهوبة عملت تصاميم جميلة، لكن الأسعار كانت غالية شوية بحكم الكميات الصغيرة اللي بتنتجها. ولما وقفت شغل، رجعت أبدأ من جديد.

هنا جات الفكرة… اتجهت لاستيراد العبايات من الكويت، وكان وقتها المجال جديد وغريب شوية. بدأت أجيب الموديلات اللي تعجبني، والباقي أبيع منه، لحد ما عملت محل بيقدم عبايات استوكات كويتي، وبعدها أضفت السعودي والقطري والإماراتي، وبقي عندي تشكيلة ضخمة وموديلات متنوعة جدًا.

ومع الوقت، بقى عندي أفكار كتير لتصاميم خاصة، وبدأت أستورد الخامات بنفسي وأشرف على كل تفصيلة، عشان أضمن الجودة، الخامة، والشياكة، وأهم حاجة… إن العباية تكون واسعة جدًا ومريحة، لكن في نفس الوقت شيك ومميزة.

الميزة اللي بحافظ عليها دايمًا هي إن الأسعار تكون مناسبة، لأننا بننتج كميات كويسة عشان التكلفة تقل ونقدر نقدم أفضل جودة بأحسن سعر لعملائنا.

وحلمي إن البراند بتاعي يبقى علامة عالمية يومًا ما… وده اللي بشتغل عليه كل يوم.